சர்வதேச விண்வெளி நிலையத்திற்கு புறப்பட்ட அமெரிக்க ராக்கெட் வெடித்து சிதறியது!

சர்வதேச விண்வெளி நிலையத்திற்கு பொருட்களை எடுத்து செல்ல புறப்பட்ட அமெரிக்க ராக்கெட் ஒன்று வெடித்து சிதறியது. சர்வதேச விண்வெளி நிலையத்திற்கு தேவையான பொருட்களை எடுத்து சென்ற அமெரிக்காவின் சரக்கு ராக்கெட் ஒன்று ஏவிய சில நிமிடங்களில் வெடித்து சிதறியது. அறிவியல் சோதனைக்கான உபகரணங்களோடு சர்வதேச விண்வெளி நிலையத்திற்கு, 5,055 பவுண்ட்ஸ் எடை கொண்ட அமெரிக்காவின் பெயரிடப்படாத சரக்கு ராக்கெட் ஒன்று புறப்பட தயாராக இருந்தது. கிழக்கு வெர்ஜினியாவில் உள்ள நாசா ஏவு தளத்திலிருந்து இன்று காலை 6.22 மணிக்கு கிளம்பிய அந்த ராக்கெட், புறப்பட்ட சில நிமிடங்களில் தீப்பிழம்புகளுடன் பயங்கர சத்தத்துடன் வெடித்து சிதறியது.

இந்த சம்பவத்தில் உயிர் சேதமோ, காயமோ யாருக்கும் ஏற்படவில்லை என்றாலும், ராக்கெட் ஏவுதளத்திற்கு சிறிய அளவில் சேதம் ஏற்பட்டுள்ளதாக அதிகாரிகள் தெரிவித்தனர். மேலும் இந்த ராக்கெட் விபத்து குறித்து தீவிர விசாரணைக்கு நாசா உத்தரவிட்டுள்ளது.