ஜய வருடப் பொதுபலன்கள் - 14.4.2014 முதல் 13.4.2015 வரை

புதிய தமிழ் வருடமான ஜய வருடம் 14.4.2014 திங்கட் கிழமை காலை மணி 7.35க்கு சுக்ல பட்சத்து சதுர்த்தசி திதி, ஹஸ்தம் நட்சத்திரம் 2-ம் பாதம், கன்னி ராசி மேஷ லக்னம், நவாம்சத்தில் விருச்சிக லக்னம் ரிஷப ராசியில், வியாகாதம் நாம யோகம் வணிசை நாம கரணத்தில், சித்தயோகம், நேத்திரம் ஜீவனம், நிறைந்த நன்னாளில் பஞ்சபட்சியில் பகல் முதல் சாமத்தில் காகம் நடைப் பயிலும் நேரத்தில் சனி ஹோரையில் கௌரி பஞ்சாங்கப்படி விஷ வேளையில் வருடம் பிறக்கிறது.

ஜய வருஷத்திய வெண்பா பாடலின் படி

செம்மண் பூமி, தழைத்து நன்கு விளையும், மக்கள் மனம் மகிழ்வார்கள்.

சுக, போகங்கள் பெருகும். ஆளுபவர்களிடையே சினம் அதிகரிக்கும் என சித்தர் பெருமான் இடைக்காடர் கூறியுள்ளார்.

மேஷம்

தொடங்கியதை முடிக்கும் வரை துவளாமல் உழைப்பவர்களே! சுக்ரன் லாப வீட்டில் வலுவடைந்திருக்கும் நேரத்தில் இந்த ஜய வருடம் பிறப்பதால் உங்களின் நீண்ட நாள் ஆசைகள் நிறைவேறும். சமூகத்தில் அந்தஸ்து ஒரு படி உயரும். கணவன்-மனைவிக்குள் ஈகோ பிரச்சினைகள் நீங்கும். குழந்தை பாக்யம் கிடைக்கும். கடந்த வருடத்தில் ஏற்பட்ட இழப்புகள், ஏமாற்றங்கள், பிரச்சினைகளிலிருந்து விடுபடுவீர்கள்.

ஜூன் 19-ம் தேதி முதல் குரு 4-ல் அமர்வதால் வீடு மாறுவீர்கள். சிலருக்கு ஊரே மாற வேண்டிய சூழ்நிலையும் உருவாகும். பிள்ளைகளின் திருமண விஷயத்தில் அவசரம் வேண்டாம். புதிய வாகனங்கள் வாங்குவதைத் தவிர்க்கவும். சிறுசிறு விபத்துகள் ஏற்படலாம். தாயாரின் உடல் நிலை பாதிக்கும். வீடு கட்டும் வேலை தாமதமாகி முடியும். வரைபட அனுமதிப் பெறாமல் வீடு கட்ட வேண்டாம்.

உறவினர்களில் ஒருசிலர் விமர்சித்துப் பேசுவார்கள். “இவர் கூட இப்படித் தானா” என்று சிலரை நினைத்து ஆதங்கப்படுவீர்கள். ஜூலை

12-ம் தேதி முதல் 7-ம் வீட்டிலிருந்து ராகு விலகி 6-ல் மறைவதால் மனைவிவழி உறவினர்களுடன் இருந்த மோதல்கள் விலகும். ஷேர் மூலம் பணம் வரும். எதிர்பார்த்த விலைக்கு வீடு, மனை விற்கும். பழைய கடனில் ஒருபகுதியை பைசல் செய்ய வழி கிடைக்கும். வெளிநாடு செல்ல விசா கிடைக்கும். ஜூலை 12 முதல் கேது உங்கள் ராசியை விட்டு விலகுவதால் தலைச்சுற்றல், தூக்கமின்மை, படபடப்பு, தயக்கம் நீங்கும்.

முடிந்து வைத்திருந்த காணிக்கையை செலுத்தி பிரார்த்தனையை நிறைவேற்றுவீர்கள். பூர்வீக சொத்துப் பிரச்சினைகள் சுமூகமாக முடியும். நவம்பர் 2-ம் தேதி முதல் கண்டகச் சனி விலகி அஷ்டமத்துச் சனி தொடங்குவதால் மறதியும், பெரிய நோய் இருப்பது போலவும் எதிர்மறை எண்ணங்களும் வந்து நீங்கும். பண விஷயத்தில் மற்றும் கல்யாண விஷயத்தில் குறுக்கே நிற்க வேண்டாம்.

வியாபாரத்தில் கடந்த வருடத்தைவிட லாபம் அதிகரிக்கும். பாக்கிகள் வசூலாகும். உத்யோகத்தில் வேலைச்சுமையும், இடமாற்றமும் இருக்கும். சிலருக்கு அன்னிய நாட்டில் வேலை கிடைக்கும்.

அதிர்ஷ்ட கிரகங்கள்: செவ்வாய் 60%, ராகு 100%

அதிர்ஷ்ட தெய்வம்: வக்ர காளி

தவிர்க்க வேண்டியவை: அநாவசியப் பேச்சு, வாகனத்தில் அதிக வேகம்

பெண்களுக்கு தங்க ஆபரணம் சேரும். வேலை கிடைக்கும்.

வாய்ப்புகள் அதிகம்: புண்ணிய ஸ்தலங்கள் செல்வதற்கு

மதிப்பெண்: 55/100

ரிஷபம்

சுற்றுப்புறச் சூழலுக்கு கட்டுப்படாமல் தனக்கென தனிப்பாதை யில் செல்பவர்களே! சனியும், ராகுவும் 6-ம் வீட்டில் வலுவடைந் திருக்கும் நேரத்தில் இந்த ஜய ஆண்டு பிறப்பதால் அடிப்படை வசதிகள் அதிகரிக்கும். கணவன் - மனைவிக்குள் நெருக்கம் உண்டு. பிள்ளைகளின் பிடிவாதப் போக்கு மாறும். மகளுக்கு நல்ல வரன் அமையும். மகனுக்கு நல்ல நிறுவனத்தில் வேலை கிடைக்கும்.

விலகிச் சென்ற சொந்த - பந்தங்கள் வலிய வந்துப் பேசுவார்கள். இழுபறியாக இருந்த சொத்துப் பிரச்சினை விரைந்து முடியும். ஜூன் 18-ம் தேதி வரை குரு 2-ல் நிற்பதால் பணப்புழக்கம் எதிர்பார்த்தபடி இருக்கும். ஜூன் 19 முதல் குரு 3-ல் மறைவதால் தவிர்க்க முடியாத செலவுகளும், பயணங்களும் அதிகமாகும். சகோதர வகையில் அலைச்சலும், செலவுகளும் இருக்கும். சில காரியங்களை முதல் முயற்சியிலேயே முடிக்க முடியாமல் போகும்.

ஜூலை 11 வரை ராகு 6-ல் நிற்பதால் வாய்தா, வாய்தா என்று தள்ளிப் போன வழக்கில் தீர்ப்பு சாதகமாக வரும். ஷேர் மூலம் ஆதாயம் உண்டு. ஆனால் ஜூலை 12-ம் தேதி முதல் ராகு 5-ல் நுழைவதால் நெருங்கிய உறவினர்களின் சிலர் ஒதுங்குவார்கள். பாகப் பிரிவினை தாமதமாக முடியும். கர்ப்பிணிப் பெண்கள் எளிதில் செரிமானமாகும் உணவுகளை உட்கொள்வது நல்லது. கேது ஜூலை 12-ம் தேதி முதல் லாப வீட்டில் நுழைவதால் குடும்ப வருமானம் உயரும். இயக்கம், சங்கம் இவற்றில் கௌரவப் பதவிக்கு தேர்ந்தெடுக்கப்படுவீர்கள்.

நவம்பர் 1-ம் தேதி வரை சனி வலுத்து 6-ல் நிற்பதால் சவாலான காரியங்களைக்கூட எளிதாக முடிப்பீர்கள். ஹிந்தி, தெலுங்கு பேசுபவர்களால் பயனடைவீர்கள். வீடு கட்ட லோன் கிடைக்கும். ப்ளான் அப்ரூவலாகி வரும். நிரந்த வருமானத்திற்கு ஏதேனும் வழி செய்ய வேண்டுமென்று நினைப்பீர்கள். வியாபாரத்தில் அக்டோபர் மாதம் வரை பற்று வரவு உயரும். நவம்பர் மாதத்திலிருந்து சந்தை நிலவரத்தை அறிந்து முதலீடு செய்வது நல்லது. உத்யோகத்தில் மறுக்கப்பட்ட சலுகைகள் கிடைக்கும். நவம்பர் மாதத்திலிருந்து வேலைச்சுமை அதிகமாகும்.

அதிர்ஷ்ட கிரகங்கள்: புதன் 65%, கேது 90%

அதிர்ஷ்ட தெய்வம்: சிவன்

தவிர்க்க வேண்டியவை: இரக்கப்பட்டு ஏமாறுதல், ஆடம்பரச் செலவு

பெண்களுக்கு குடும்பத்தில் உங்கள் கை ஓங்கும், வாகனம் வாங்குவீர்கள்.

வாய்ப்புகள் அதிகம்: திருமணம், அயல்நாட்டுப் பயணம்.

மதிப்பெண்: ஏப்ரல் 14 முதல் அக்டோபர் வரை 85/100, நவம்பர் முதல் ஏப்ரல் 13 வரை 60/100.

மிதுனம்

மன்னிக்கும் குணமும், மற்றவர்களிடம் உதவி கேளாத மனஉறுதியும் உள்ளவர்களே! கடந்த விஜய வருடம் உங்களை நாலா விதத்திலும் பாடாய்படுத்தியது. எதிலும் நிம்மதி இல்லாமலும் போனது. பணப்பற்றாக்குறையால் பல நேரங்களில் செலவுகளை சமாளிக்க முடியாமல் கையைப் பிசைந்துகொண்டு அலைந்தீர்களே! உங்கள் யோகாதிபதி சுக்ரன் பணபலம் தரும் வீடான ஒன்பதாம் வீட்டில் நிற்கும் போது இந்த வருடம் பிறப்பதால் உங்கள் கை ஓங்கும்.

குடும்ப வருமானம் உயரும். எதிர்பார்த்த தொகைகளும் கைக்கு வரும். தங்க ஆபரணங்கள் வாங்குவீர்கள். மகளுக்கு தள்ளிப் போன திருமணம் கூடி வரும். நீண்ட நாட்களாக குழந்தை வரம் வேண்டியவர்களுக்கு இந்த வருடம் பிள்ளை பாக்கியம் கிடைக்கும். ஜூன் 19-ல் இருந்து பெரிய நோய்கள் இருப்பது போன்ற மனபீதியெல்லாம் விலகும். எதைத் தொடங்குவதாக இருந்தாலும் ஒருவித தயக்கம், தடுமாற்றம் இருந்ததே அது விலகும். ஜூலை 12 முதல் ராகு உங்கள் ராசிக்கு 4-ம் வீட்டிலும், கேது 10-ம் வீட்டிலும் அமர்வதால் வேலைச்சுமை அதிகமாகும்.

நாடு, நகரம் வளர்ந்தாலும், நாகரிகம் அதிகரித்திருந்தாலும் உங்களைச் சுற்றியிருக்கும் உறவினர்களில் ஒருசிலர் இன்னமும் மாறவில்லையே என ஆதங்கப்படுவீர்கள். சக்திக்கு மீறி உதவினாலும் ஒருசிலர் அதை சாதாரணமாக எடுத்துக் கொள்வதை நினைத்துப் புலம்புவீர்கள். கடந்த இரண்டரை ஆண்டுகளாக உங்கள் பூர்வபுண்ணிய ஸ்தானத்தில் உட்கார்ந்து உங்களின் நிம்மதியையும், தூக்கத்தையும் கெடுத்துக் கொண்டிருக்கும் சனி, நவம்பர் 2-ம் தேதி முதல் ஆறாம் வீட்டில் அமர்கிறார். அதுமுதல் சாதிக்கத் தொடங்குவீர்கள். பணம் சேமிக்கும் அளவிற்கு வரத் தொடங்கும். தலைமுறை தாண்டிய பகையெல்லாம் தீர்ந்து ஒற்றுமை உண்டாகும்.

வீடு, மனை அமையும். அந்தஸ்தும் உயரும். வியாபாரத்தில் புதிய பங்குதாரர்களால் லாபம் அதிகமாகும். கடனை முடிப்பீர்கள். உத்தியோகத்தில் இதுவரை சந்தித்த அவமானங்கள், இழப்புகளுக்குப் பரிசாக பதவி உயர்வு, சம்பள உயர்வு உண்டு. சிலருக்கு நல்ல வேலையும் கிடைக்கும்.

அதிர்ஷ்ட கிரகங்கள்: நவம்பர் முதல் சனி 95%, புதன் 60%

அதிர்ஷ்ட தெய்வம்: பார்த்தசாரதி பெருமாள்

தவிர்க்க வேண்டியவை: கார உணவுகள், பெற்றோருடன் விவாதங்கள்.

பெண்களுக்கு நவம்பரில் ஆபரணம் சேரும். பிள்ளைகளால் அந்தஸ்து உயரும்.

வாய்ப்புகள் அதிகம்: புது வேலை, வீடு கட்ட.

மதிப்பெண்: அக்டோபர் வரை 40/100 நவம்பர் முதல் 72/100

கடகம்

ஊர், உலகத்தையெல்லாம் அறிந்து வைத்திருக்கும் நீங்கள், உடனிருப்பவர்களை கணிக்காமல் விட்டுவிடுவீர்கள். உங்கள் ராசிநாதன் சந்திரன், யோகாதிபதி செவ்வாயுடன் சேர்ந்திருக்கும் நேரத்தில் இந்த ஜய வருடம் பிறப்பதால் கடந்த வருடத்தில் ஏற்பட்ட காயங்களுக்கு மருந்து கிடைக்கும். சகோதர வகையில் இருந்த மனக்கசப்புகள் நீங்கும். செப்டம்பர், அக்டோபர் மாதங்களில் வீடு, மனை அமையும். வாகனத்தையும் மாற்றுவீர்கள். மகளுக்கு நல்ல வரன் அமையும்.

மகனுக்கும் தள்ளிப் போன விஷயங்களெல்லாம் கூடி வரும். ஜூன் 19-ம் தேதி முதல் குரு உங்கள் ராசிக்குள் நுழைவதால் இனம் தெரியாத மனக்கவலைகள் வந்து செல்லும். சளித் தொந்தரவால் மூச்சுத் திணறலும், வாயுக் கோளாறால் நெஞ்சு வலியும் வரக்கூடும். கணவன்,மனைவிக்குள் உப்பு பொறாத விஷயத்திற்கெல்லாம் சலசலப்பு வரும். உங்கள் ராசிக்கு சுகஸ்தானமான 4-ம் வீட்டில் கடந்த ஒன்றரை ஆண்டுகளாக உட்கார்ந்து பாடாய்படுத்தும் ராகு, ஜூலை 12-ம் தேதி முதல் 3-ல் அமர்வதால் பிரச்சினைகளை சமாளிக்கும் மனப்பக்குவம் கிடைக்கும். பழைய கடனைத் தீர்க்க வழிபிறக்கும்.

பழைய மனை அல்லது வீட்டை நல்ல விலைக்கு விற்று நெருக்கடியிலிருந்து வெளிவருவீர்கள். தாயாரின் உடல் நிலை சீராகும். என்றாலும் நவம்பர் 1-ம் தேதி வரை அர்த்தாஷ்டமச் சனி இருப்பதால் அதுவரை தாயாருடன் மனக்கசப்புகள் இருக்கும். உறவினர்களில் ஒருசிலர் உங்களைத் தவறாகப் புரிந்து கொள்வார்கள். ஆனால் நவம்பர் 2 முதல் அர்த்தாஷ்டமச் சனி விலகுவதால் அதுமுதல் வேலைச்சுமை குறையும். மூட்டு, முதுகு வலி நீங்கும். கேது ஜூலை 12 முதல் 9-ம் இடத்தில் அமர்வதால் செலவினங்களைக் குறைக்க முடியாமல் விழி பிதுங்குவீர்கள். தந்தையாருக்கு அலைச்சல், சுகவீனங்கள் இருக்கும்.

வியாபாரத்தில் கடந்த ஆண்டை விட இந்த ஜய வருடத்தில் லாபம் அதிகரிக்கும். போட்டிகளைச் சமாளிக்கத் தயாராவீர்கள். வேலையாட்கள் தொடர்பான பிரச்னை டிசம்பர் மாதம் முதல் குறையும். உத்தியோகத்தில் அதிகாரிகளின் மனஓட்டத்தை அறிந்து செயல்படத் தொடங்குவீர்கள். இழந்த சலுகைகளை பெற்று நிம்மதியடைவீர்கள்.

அதிர்ஷ்ட கிரகங்கள்: செவ்வாய் 60%, ஜூலை முதல் ராகு 85%

அதிர்ஷ்ட தெய்வம்: காமாட்சி அம்மன்

தவிர்க்க வேண்டியவை: முன்கோபம், நொறுக்குத் தீனி

பெண்களுக்கு தன்னம்பிக்கை கூடும். பதவி, வேலை கிடைக்கும்.

வாய்ப்புகள் அதிகம்: புது வாகனம் வாங்க, வீடு மாற.

மதிப்பெண்: அக்டோபர் வரை 37/100 நவம்பர் முதல் 65/100

சிம்மம்

மனம் திறந்து பேசுவதால் மதிக்கப்படுபவர்களே! உங்களுக்கு இரண்டாவது ராசியில் இந்த ஜய வருடம் பிறப்பதால் வருமானம் உயரும். அரை குறையாக நின்று போன வேலைகள் உடனே முடியும். மகளுக்குத் தள்ளிப் போன திருமணம் தடபுடலாக நடக்கும். உங்கள் ரசனைக்கேற்ப வீடு அமையும். அரசு விஷயங்கள் சாதகமாகும். தள்ளிப் போய்க் கொண்டிருந்த வழக்கில் நல்ல தீர்ப்பு வரும்.

அதிகார மையத்தில் இருப்பவர்கள் அறிமுகமாவார்கள். சுக்கிரன் சாதகமாக இருக்கும் போது இந்த வருடம் பிறப்பதால் விலை உயர்ந்த ஆபரணங்கள் வாங்குவீர்கள். பழுதான வாகனத்தை மாற்றுவீர்கள். சகோதர வகையில் இருந்த மனவருத்தங்கள் நீங்கும். வைகாசி, ஆனி மாதங்களில் திடீர் பணவரவும், செல்வாக்கும் கூடும். வீடு கட்ட லோன் கிடைக்கும். ஜூன் 19 முதல் குரு 12-ம் இடத்தில் மறைவதால் திடீர் பயணங்களும், தவிர்க்க முடியாத செலவுகளும் அதிகரிக்கும். பழைய கடனை பைசல் செய்யும் அளவு பணம் வரும்.

நல்ல காற்றோட்டம் உள்ள வீட்டிற்கு மாறுவீர்கள். புது வேலை அமையும். ஜூலை 11 வரை ராகு சாதகமாக இருப்பதால் வேற்றுமதத்தைச் சார்ந்தவர்கள் உதவியாக இருப்பார்கள். வெளிநாடு செல்ல விசா கிடைக்கும். ஜூலை 12 முதல் ராகு 2-ம் இடத்தில் அமர்வதால் அந்தரங்க விஷயங்களை வெளியிடாதீர்கள். வாக்குறுதி களும் தர வேண்டாம். ஜூலை 12 முதல் கேது 8-ம் இடத்தில் மறைவதால் உணர்ச்சிவேகத்தில் பெரிய முடிவுகள் எடுப்பதைத் தவிர்ப்பது நல்லது. மற்றவர்களுக்கு உத்தரவாதக் கையொப்பமிட வேண்டாம். நவம்பர் 1-ம் தேதி முதல் சனி 3-ல் நிற்பதால் சவாலான காரியங்களையும் எளிதாக முடிப்பீர்கள்.

ஷேர் மூலம் பணம் வரும். செல்வாக்குக் கூடும் ஆனால் நவம்பர் 2-ம் தேதி முதல் அர்த்தாஷ்டமச் சனி தொடங்குவதால் வீடு, வாகனப் பராமரிப்புச் செலவு அதிகமாகும். வியாபாரத்தில் தொடர்ந்து லாபம் அதிகரிக்கும். உத்யோகத்தில் உங்கள் கை ஓங்கும். வருடத்தின் மத்தியப் பகுதியிலிருந்து உங்கள் நடவடிக்கைகள் சிலரால் கண்காணிக்கப்பட வாய்ப்பிருக்கிறது.

அதிர்ஷ்ட கிரகங்கள்: குரு 60%, செவ்வாய் 65%

அதிர்ஷ்ட தெய்வம்: ஸ்ரீ தட்சிணாமூர்த்தி

தவிர்க்க வேண்டியவை: திடீர் முடிவுகள், அதீத தன்னம்பிக்கை

பெண்களுக்கு தொட்டதெல்லாம் துலங்கும். நீண்ட நாள் கனவு நனவாகும்.

வாய்ப்புகள் அதிகம்: சொத்து வாங்க, சொந்த - பந்தங்களுடன் சேர

மதிப்பெண்: அக்டோபர் வரை 87/100 நவம்பர் முதல் 55/100

கன்னி

இரக்கக் குணம் அதிகமாகும் போதெல்லாம் ஏமாறுபவர்களே! உங்கள் ராசியிலேயே இந்த வருடம் பிறப்பதால் வருடத்தின் முற்பகுதியில் உடல்நிலை பாதிக்கும். பணப்பற்றாக்குறையும் இருக்கும். உங்கள் ராசிநாதன் புதன் நீசமாகி நிற்பதால் வருங்காலம் பற்றிய சின்னச் சின்ன கவலைகள் வந்துப் போகும். விஜய வருடத்தில் ஏற்பட்ட வேதனைகள், அவமானங்கள் யாவுமே ஜூன் 19 முதல் குரு, லாப வீட்டில் நுழைவதால் கொஞ்சம் கொஞ்சமாக விலகும்.

பணம் வரத் தொடங்கும். எந்த நேரத்தில் எந்தப் பிரச்னை வருமோ என்ற அச்சம் நீங்கும். பிளவுப்பட்ட குடும்பம் ஒன்று சேரும். வேலை கிடைக்காமல் போனவர்களுக்கு வேலை கிடைக்கும். குழந்தை பாக்யம் உண்டு. பிள்ளைகளிடமிருக்கும் பொறுப்பற்ற போக்கு மாறும். மகனுக்கு நல்ல வாழ்க்கைத்துணை அமையும். ஜூலை 12 முதல் ராகு உங்கள் ராசிக்குள் வருவதாலும், கேது உங்கள் ராசிக்கு 7-ம் இடத்தில் அமர்வதாலும் ஒவ்வாமை மற்றும் நோய்த்தொற்று வந்து போகும்.

கணவன்-மனைவிக்குள் குழப்பத்தை ஏற்படுத்த சிலர் முயற்சி செய்வார்கள். வீண் சந்தேகத்தின் அடிப்படையில் விவாதம் செய்து கொண்டிருக்க வேண்டாம். நவம்பர் 2-ம் தேதி முதல் ஏழரைச் சனி முழுமையாக விலகுவதால் சிக்கல்கள், வழக்குகள், மனஉளைச்சல்களிலிருந்து விடுபடுவீர்கள். ஆரோக்கியம், அழகு அதுமுதல் கூடும். ஏமாந்து போன தொகை கைக்கு வரும்.

எதற்கெடுத்தாலும் கோபப்பட்டீர்களே! அந்த முன்கோபம் நீங்கும். நவம்பர் 1-ம் தேதி வரை பாதச்சனி தொடர்வதால் வீண்பழி, கடன் பிரச்சினை, கை, கால் வலி அதிகரிக்கும். ஆனால் 2-ம் தேதி முதல் மகனுக்கு அயல்நாட்டில் வேலை கிடைக்கும். பிள்ளைகளால் சமூகத்தில் அந்தஸ்து ஒருபடி உயரும். வீடு, மனை வாங்குவீர்கள். அடகிலிருந்த நகையை மீட்பீர்கள். சிலர் புதுத்தொழில் தொடங்குவீர்கள். வெளிநாட்டிலிருப்பவர்களால் ஆதாயமடைவீர்கள். வியாபாரத்தில் வருடத்தின் பிற்பகுதியில் லாபம் அதிகரிக்கும்.

நல்ல இடத்தில் கடையை மாற்றுவீர்கள். உத்யோகத்தில் நீண்டகாலமாக தள்ளிப்போன பதவி உயர்வு, சம்பள உயர்வு வருடத்தின் மத்தியப் பகுதியிலிருந்து கிடைக்கும்.

அதிர்ஷ்ட கிரகங்கள்: சுக்ரன் 95% ஜூன் 19 முதல் குரு 90% நவம்பர் 2 முதல் சனி 100%

அதிர்ஷ்ட தெய்வம்: முருகன்

தவிர்க்க வேண்டியவை: பழசை சொல்லி முணுமுணுத்தல்

பெண்களுக்கு திருமணம் கூடி வரும். வசதி, வாய்ப்புகள் பெருகும்.

வாய்ப்புகள் அதிகம்: வீடு, வாகனம் வாங்குவதற்கு.

மதிப்பெண்: நவம்பர் முதல் 85/100

துலாம்

எல்லோரும் விரும்பும்படி இணக்கமாகப் பேசி வழி நடத்திச் செல்வதில் வல்லவர்களே! குரு உங்கள் ராசிக்கு 9-ம் வீட்டில் நிற்கும்போது இந்த ஜய வருடம் பிறப்பதால் கடந்த வருடத்தில் முடிக்க முடியாத விஷயங்கள் இந்த வருடத்தில் முடிவடையும். கணவன், மனைவிக்குள் இருந்து வந்த சலசலப்புகள் நீங்கும். குழந்தை பாக்கியம் கிடைக்கும். பிள்ளைகளின் தனித்திறமைகளைக் கண்டறிந்து ஊக்கப்படுத்துவீர்கள்.

ஜூன் 19 முதல் குரு, 10-ம் இடத்தில் அமர்வதால் வேலைச்சுமை அதிகமாகும். சிலர் உங்களது பெயரை தவறாகப் பயன்படுத்தக்கூடும். பணம் வாங்கித் தருவதில் குறுக்கே நிற்க வேண்டாம். பிள்ளைகளின் திருமண விஷயத்தில் யோசித்து முடிவெடுப்பது நல்லது. ஜூலை 11 வரை உங்கள் ராசியிலேயே ராகு நிற்பதால் வெளி உணவுகளைத் தவிர்ப்பது நல்லது. நாய், பூனையிடம் கவனமாக இருப்பது நல்லது. ஜூலை 12 முதல் ராகு ராசியை விட்டு விலகுவதாலும், கேது 6-ம் வீட்டில் வந்தமர்வதாலும் பழைய பிரச்சினைகளைத் தீர்க்க வழி கிடைக்கும்.

ஷேர் மூலம் பணம் வரும். பழைய கடனில் ஒருபகுதியை பைசல் செய்வீர்கள். புகழ்பெற்ற புண்ணிய ஸ்தலங்கள் சென்று வருவீர்கள். நவம்பர் 1 வரை ஜென்மச்சனி தொடர்வதால் தோலில் நமைச்சல், தலைச்சுற்றல், மந்தம், மறதி வந்து நீங்கும். நவம்பர் 2-ம் தேதி முதல் மருந்து, மாத்திரை குறையும். ஏமாந்து போன தொகை கைக்கு வரும். ஆனால் மூட்டு வலி, கழுத்து வலி வந்து நீங்கும். உங்கள் ராசிநாதன் சுக்ரன் 5 -ல் அமர்ந்திருக்கும் நேரத்தில் இந்த ஜய வருடம் பிறப்பதால் மகளுக்குத் தள்ளிப்போன திருமணம் முடியும். மகனின் கோபம் குறையும். வெளிவட்டாரத்தில் செல்வாக்கு அதிகரிக்கும். செவ்வாய் வக்ரம் பெற்று 12-ல் மறைந்திருக்கும் நேரத்தில் இந்தாண்டு பிறப்பதால் வீடு, மனை வாங்கும் போது மூலப்பத்திரத்தைச் சரிபார்ப்பது நல்லது.

சகோதரர்களால் அலைச்சல் இருக்கும். சின்னச் சின்ன மனஸ்தாபம் வந்து நீங்கும். வியாபாரத்தில் அதிக முதலீடுகள் வேண்டாம். கமிஷன், புரோக்கரேஜ் வகைகளால் லாபம் உண்டு. ஜூலை மாதத்திலிருந்து புதுப் பங்குதாரர்கள் வருவார்கள். உத்தியோகத்தில் உங்கள் நிலையைத் தக்க வைத்துக் கொள்ளக் கடுமையாகப் போராட வேண்டி வரும். டிசம்பர் மாதத்திலிருந்து மேலதிகாரிக்கு நெருக்கமாவீர்கள். சிலருக்கு வெளிநாட்டிலும் வேலை கிடைக்கும்.

அதிர்ஷ்ட கிரகங்கள்: புதன் 73% ஜூலை முதல் கேது 85%

அதிர்ஷ்ட தெய்வம்: வெங்கடாஜலபதி

தவிர்க்க வேண்டியவை: காலம் கடந்து சாப்பிடுதல், அலுத்துக் கொள்ளுதல்

பெண்களுக்கு மாமனார், மாமியார் பிரச்சினை தீரும், சுயமாகச் சிந்தித்து முடிவெடுக்கத் தொடங்குவீர்கள்.

வாய்ப்புகள் அதிகம்: பழைய கடனில் கொஞ்சம் தீர, வழக்குகள் முடிய.

மதிப்பெண்: 60 %

விருச்சிகம்

சூட்சுமப் புத்தியால் சூழ்ச்சிகளை முறியடித்து முன்னேறுபவர்களே! கடந்த வருடத்தில் அடுக்கடுக்காகப் பல பிரச்சினைகளைச் சந்தித்தீர்கள். குடும்பத்திலும் பிள்ளைகளால் நிம்மதி இழந்தீர்கள். சிறுசிறு விபத்துகள், உறவினர், நண்பர்களால் தவிர்க்க முடியாத செலவுகள் எனப் பல வகையிலும் அலைக்கழிக்கப்பட்டீர்கள்! ஆனால் இந்த ஜயவருடம் உங்களுக்கு லாப வீட்டில் பிறப்பதால் உற்சாகம் பிறக்கும்.

தாழ்வுமனப்பான்மை நீங்கும். தைரியமாகச் சில முக்கிய முடிவுகள் எடுப்பீர்கள். கைமாற்றாக வாங்கியிருந்த பணத்தைக் கொடுத்து முடிப்பீர்கள். அதிக வட்டிக் கடனிலிருந்து மீள குறைந்த வட்டிக்கு கடன் உதவி கிடைக்கும். புது வாகனம் வாங்குவீர்கள். சுக்கிரன் சாதகமாக இருக்கும் போது இந்த வருடம் பிறப்பதால் உங்கள் ரசனைக்கேற்ப வீடு அமையும். நகரை ஒட்டியுள்ள பகுதியில் காலி மனை வாங்குவீர்கள். பிள்ளைகளின் பிடிவாதப் போக்கு மாறும். அவர்களை எதிர்பார்த்த பாடப்பிரிவில் சேர்ப்பீர்கள்.

தொழிலதிபர்களின் அறிமுகம் கிடைக்கும். ஜூன் 19 முதல் குரு உங்கள் ராசிக்கு, 9 இல் அமர்வதால் குடும்ப வருமானம் உயரும். குழந்தை பாக்கியம் கிடைக்கும். மனக்கசப்புடன் பேசாமல் இருந்து வந்த பழைய சொந்தங்கள் தேடி வரும். அடகிலிருந்த நகையை மீட்பீர்கள். மகளுக்கு நல்ல வரன் அமையும். இந்த வருடம் பிறக்கும்போது செவ்வாய் 11-ம்

வீட்டில் நிற்பதால் உடன்பிறந்தவர்களுடன் இருந்த மோதல் போக்கு நீங்கும். உங்கள் ராசிக்கு 12-ல் அமர்ந்து உங்கள் தூக்கத்தைக் கெடுத்துக் கொண்டிருக்கும் ராகு, ஜூலை 12 முதல் லாபவீட்டில் அமர்வதால் திடீர் பணவரவு உண்டு. தடைப்பட்ட வேலைகள் உடனே முடியும். உங்களுக்குள் இருந்த மூர்க்கத்தனம் விலகும். புது வேலை கிடைக்கும். கேது ஜூலை 12 முதல் 5-ல் அமர்வதால் கர்ப்பிணிப் பெண்கள் இரவு நேரப் பயணங்களைத் தவிர்ப்பது நல்லது. பூர்வீக சொத்துப் பிரச்சினையில் உங்கள் சக்தியை வீணடிக்க வேண்டாம்.

நவம்பர் 1-ம் தேதி வரை விரயச்சனி தொடர்வதால் திடீர் பயணங்களால் சோர்வடைவீர்கள். நவம்பர் 2-ம் தேதி முதல் ஜென்மச்சனி தொடங்குவதால் தினசரி நடைப்பயிற்சி மேற்கொள்வது நல்லது. கொழுப்பு, எண்ணெய்ப் பதார்த்தங்களைத் தவிர்க்கப் பாருங்கள். வியாபாரத்தில் செப்டம்பர் முதல் லாபம் அதிகரிக்கும். கடையை விரிவுபடுத்துவீர்கள். புதிய பங்குதாரர்கள் வருவார்கள். உத்யோகத்தில் எதிராகச் செயல்பட்ட அதிகாரி மாறுவார். சம்பளம் உயரும்.

அதிர்ஷ்ட கிரகங்கள்: குரு 90% செப்டம்பர் முதல் செவ்வாய் 70%

அதிர்ஷ்ட தெய்வம்: மருதமலை முருகன்

தவிர்க்க வேண்டியவை: முன்கோபம், எடுத்தெறிந்து பேசுதல்

பெண்களுக்கு செல்வம், செல்வாக்கு கூடும், வேலை கிடைக்கும்

வாய்ப்புகள் அதிகம்: வீடு, மனை வாங்க, தொழில் தொடங்க

மதிப்பெண்: 85%

தனுசு

தடுமாறி அழுபவர்களைத் தாங்கி நிற்கும் விழுதுகளே! உங்களுக்கு 10-ம் ராசியில் இந்த வருடம் பிறப்பதால் பல வகையிலும் முன்னேறுவீர்கள். இலவு காத்த கிளியாக இனி காத்திருக்காமல் முதல் முயற்சியிலேயே பல வேலைகளை முடித்துக் காட்டுவீர்கள். கணவன், மனைவிக்குள் ஒரு மௌன யுத்தம் இருந்ததே! ஒரே வீட்டில் இருந்தாலும் ஒட்டு, உறவு இல்லாமல் இருந்த நிலை மாறும்.

அன்னியோன்யமும் அதிகமாகும். குழந்தை பாக்யம் கிடைக்கும். வருமானம் உயரும். ஜூன் 19 முதல் உங்கள் ராசிநாதன் குரு, 8-ல் அமர்வதால் வேலைச்சுமை அதிகமாகும். செலவுகளும் அடுத்தடுத்து இருக்கும். பழைய கடனை பைசல் செய்வதற்குப் பழைய சொத்தை விற்பீர்கள். உங்கள் பூர்வ புண்ணியாதிபதி செவ்வாய் வலுவாக நிற்கும் நேரத்தில் இந்த ஆண்டு பிறப்பதால் புதுத்தொழில் தொடங்க உதவிகள் கிடைக்கும். வெளிமாநிலம் அல்லது வெளிநாட்டில் வேலை அமையும்.

பிள்ளைகளால் சமூகத்தில் ஒருபடி அந்தஸ்து உயரும். பூர்வீக சொத்தில் இருந்து வந்த பிரச்சினைகள் தீரும். வழக்கில் வெற்றி உண்டு. ஜூலை 12 முதல் கேது 4-ம் வீட்டிலும், ராகு 10-ம் வீட்டிலும் நுழைவதால் வீடு மாறவேண்டிய சூழ்நிலை உருவாகும். வாகனம் அடிக்கடி செலவு வைக்கும். தாய்வழி உறவினர்களால் அலைச்சல் அதிகமாகும். நவம்பர் 1-ம் தேதி வரை சனி, லாப வீட்டில் நிற்பதால் ஷேர் மூலம் பணம் வரும். மற்றவர்களால் முடியாத விஷயங்களையெல்லாம் முடித்துக் காட்டுவீர்கள். நவம்பர் 2 முதல் ஏழரைச் சனி தொடங்குவதால் இனந்தெரியாத மனக்கவலைகள் வந்து நீங்கும்.

நட்பு வட்டம் மாறும். கூடாப் பழக்கவழக்கம் உள்ளவர்களைத் தவிர்ப்பது நல்லது. சமீப காலத்தில் அறிமுகமானவர்களை நம்பி வீட்டிற்கு அழைத்து வர வேண்டாம். அயல்நாட்டிலிருப்பவர்களால் ஆதாயம் உண்டு. சுக்ரன் சாதகமான நட்சத்திரத்தில் செல்லும் போது இந்த வருடம் பிறப்பதால் தள்ளிப் போன திருமணம் முடியும். எதிர்பாராத பணவரவு உண்டு. பழுதான மின்னணு, மின்சார சாதனங்களை மாற்றுவீர்கள். வியாபாரத்தில் புது ஒப்பந்தங்கள் கையெழுத்தாகும். பழைய பாக்கிகள் வசூலாகும். உத்யோகத்தில் வேலைச்சுமை அதிகமானாலும் அதிகாரிகள் உங்களுக்கு ஒத்துழைப்பார்கள்.

அதிர்ஷ்ட கிரகங்கள்: செவ்வாய் 75% சூரியன் 60%

அதிர்ஷ்ட தெய்வம்: சூரிய நமஸ்காரம்

தவிர்க்க வேண்டியவை: வதந்திகளை நம்ப வேண்டாம், கூடுதல் செலவு

பெண்களுக்கு புது நட்பு மலரும், புதிய பொறுப்புகள் ஏற்பீர்கள்

வாய்ப்புகள் அதிகம்: இடம் மாற்றம், பழைய சிக்கல் தீர

மதிப்பெண்: 58%

மகரம்

மன்னிப்பதால் மகிழ்ச்சியை அடிக்கடி உணருபவர்களே! கடந்த விஜய வருடம் உங்களை எல்லா வகையிலும் புரட்டிப் போட்டது. எதைத் தொட்டாலும் பிரச்சினையானது, பணப்பை வறண்டது! நல்லது செய்யப் போய் கெட்ட பெயர்தான் மிஞ்சியது! இனி இந்த அவல நிலையெல்லாம் மாறும். உங்கள் ராசிக்கு 2-ல் சுக்ரன் வலுவாக அமர்ந்திருக்கும்போது இந்த ஜய வருடம் பிறப்பதால் வர வேண்டிய பணமெல்லாம் வந்து சேரும்.

அரைகுறையாக நின்றுபோன வேலைகளையெல்லாம் உற்சாகமாக செய்து முடிப்பீர்கள். பிரபலங்கள் ஆதரவாக இருப்பார்கள். உங்கள் ரசனைக்கேற்ப வீடு, மனை ஆகியவை அமையும். வங்கிக் கடன் கிட்டும். பிள்ளைகளால் மரியாதை கூடும். புது வேலை கிடைக்கும். ஜூன் 19-ம் தேதி முதல் குரு 7-ம் வீட்டில் அமர்வதால் உங்கள் வார்த்தைக்கு மதிப்பு அதிகரிக்கும்.

விலை உயர்ந்த தங்க ஆபரணம் வாங்குவீர்கள். பிள்ளைகளால் இருந்து வரும் பிரச்சினைகள் தீரும். பொறுப்பாக நடந்துகொள்வார்கள். அரசு சம்பந்தப்பட்ட விஷயங்கள் உடனே முடியும். வழக்குகளில் இருந்த தேக்க நிலை மாறும். ஜூலை 12-ம் தேதி முதல் கேது 4-ம் வீட்டை விட்டு விலகி 3-ல் அமர்வதால் தாயாரின் உடல் நிலை சீராகும். புதிய திட்டங்கள் நிறைவேறும். பழுதான வாகனத்தை விற்று விட்டுப் புது வாகனம் வாங்குவீர்கள்.

ஜூலை 11 வரை ராகு 10-ம் இடத்தில் நிற்பதால் ஓய்வெடுக்க முடியாதபடி வேலைச்சுமை கூடும். உத்யோகத்தில் பிடிப்பற்ற போக்கு காணப்படும். வீண் பழி ஏற்பட்டு விலகும். ஜூலை 12-ம் தேதி முதல் ராகு 9-ம் வீட்டில் நுழைவதால் வீண் செலவுகள், அலைச்சல், தந்தையுடன் வீண் விவாதம், பிதுர்வழி சொத்துப் பிரச்சினைகள் வந்து செல்லும். நவம்பர் 1-ம் தேதி வரை உங்கள் ராசிநாதன் சனி 10-ல் நிற்பதால் அயல்நாடு செல்ல விசா கிடைக்கும். என்றாலும் உத்யோகத்தில் வேலைச்சுமை இருப்பதாக ஆதங்கப்படுவீர்கள். நவம்பர் 2-ம் தேதி முதல் சனிபகவான்

11-ம் வீட்டில் நுழைவதால் பணவரவு அதிகரிக்கும். குடும்பத்தில் இழந்த செல்வாக்கை மீண்டும் பெறுவீர்கள். வியாபாரத்தில் நஷ்டங்களிலிருந்து விடுபடுவீர்கள். லாபம் அதிகரிக்கும். புகழ் பெற்ற புது நிறுவனத்துடன் ஒப்பந்தம் செய்வீர்கள். பிரபலங்கள் வாடிக்கையாளர்களாவார்கள். புது முதலீடு செய்வீர்கள். உத்யோகத்தில் உங்கள் கை ஓங்கும். எதிர்பார்த்த இடமாற்றம் கிடைக்கும். சம்பளம் உயரும். சக ஊழியர்கள் மதிப்பார்கள்.

அதிர்ஷ்ட கிரகங்கள்: ஜூன் முதல் குரு 85% சுக்ரன் 69%

அதிர்ஷ்ட தெய்வம்: அருணாசலேஸ்வரர்

தவிர்க்க வேண்டியவை: குடும்ப ரகசியங்களை வெளியிட வேண்டாம், பழைய சோகங்களை அசை போடுவது.

பெண்களுக்கு வசதி வாய்ப்புகள் பெருகும், நினைத்தது நிறைவேறும்.

வாய்ப்புகள் அதிகம்: மரியாதை அதிகரிக்க

மதிப்பெண்: 93%

கும்பம்

கொடுத்ததைத் திரும்பக் கேட்டால் தப்பாகி விடுமோ என்று நினைப்பவர்களே! உங்கள் ராசிக்கு 5-ம் வீட்டில் குரு அமர்ந்திருக்கும்போது இந்த ஜய வருடம் பிறப்பதால் நினைத்த காரியங்கள் நிறைவேறும். பிரிந்து கிடந்த குடும்பம் ஒன்றுசேரும். 13.7.2014 வரை உங்கள் ராசிக்கு 8-ம் வீட்டில் செவ்வாய் நிற்பதால் அதுவரை பயணங்களால் செலவுகள் அதிகமாகும். சகோதர வகையில் மனத்தாங்கல் வரும். ஜூன் 19 வரை குரு சாதகமாக இருப்பதால் பிள்ளைகள் உங்கள் பேச்சுக்கு மதிப்பளிப்பார்கள்.

அவர்களின் உயர்கல்வி, உத்தியோகம் சம்பந்தப்பட்ட முயற்சிகள் வெற்றியடையும். குடும்பத்தினருடன் சென்று குலதெய்வப் பிரார்த்தனையை நிறைவேற்றுவீர்கள். ஜூன் 19-ம் தேதி முதல் குரு 6-ல் மறைவதால் மற்றவர்களுக்குப் பணம், நகை வாங்கித் தருவதில் குறுக்கே நிற்க வேண்டாம். சிலர் வீண் பழி சுமத்த முயல்வார்கள். தோற்றுவிடுவோமோ என்ற அவநம்பிக்கையும் வந்துபோகும். அக்டோபர், நவம்பர், டிசம்பர் மற்றும் மார்ச் ஆகிய மாதங்களில் உங்கள் யோகாதிபதி சுக்ரனின் போக்கு சாதகமாக இருப்பதால் தடைப்பட்ட காரியங்கள் விரைந்து முடியும்.

ஓரளவு நிம்மதி, திடீர் பணவரவு, புதுப் பொறுப்புகள் வந்து சேரும். ஜூலை 11 வரை கேது உங்கள் ராசிக்கு 3-ம் வீட்டில் நிற்பதால் தைரியமாகச் சில முக்கிய முடிவுகள் எடுப்பீர்கள். ஷேர் மூலமாகப் பணம் வரும். ஆனால் ராகு 9-ம் வீட்டில் நீடிப்பதால் வீண் விரயம், தந்தைக்கு வீண் டென்ஷன் வந்து செல்லும். ஜூலை 12-ம் தேதி முதல் கேது உங்கள் ராசிக்கு 2-ம் வீட்டிலும், ராகு 8-லும் மறைவதால் வீண் சந்தேகம், எதிலும் நம்பிக்கையின்மை, பார்வைக் கோளாறு, பல் வலி, பேச்சால் பிரச்சினைகள் வந்து நீங்கும்.

நவம்பர் 1-ஆம் தேதி வரை உங்கள் ராசிநாதன் சனிபகவான் 9-ம் வீட்டில் நிற்பதால் இடையூறுகளைக் கடந்து வெற்றி பெறுவீர்கள். பிதுர்வழி சொத்துப் பிரச்சினை முடிவுக்கு வரும். நவம்பர் 2-ம் தேதி முதல் 10-ம் வீட்டில் சனி நுழைவதால் வீண் வதந்திகள், அக்கம்-பக்கம் வீட்டாருடன் பிரச்சினைகள் வந்தாலும் புதிய பதவிகளுக்குத் தேர்ந்தெடுக்கப்படுவீர்கள். வியாபாரத்தில் போட்டிகளைச் சமாளிக்க அதிகம் உழைக்க வேண்டி வரும். திடீரென்று அறிமுகமாகுபவரை நம்பிப் புது முதலீடுகள் செய்ய வேண்டாம். பழைய சரக்குகள் விற்றுத் தீரும். உத்யோகத்தில் உயரதிகாரிகள் உங்களுக்கு முக்கியத்துவம் தருவார்கள். என்றாலும் கூடுதலாக வேலை பார்க்க வேண்டி வரும்.

அதிர்ஷ்ட கிரகங்கள்: புதன் 85% சுக்ரன் 67%

அதிர்ஷ்ட தெய்வம்: விநாயகர்

தவிர்க்க வேண்டியவை: கௌரவச் செலவுகள், பிறர் விஷயங்களில் தலையிடுதல்

பெண்களுக்கு புதியவர்களிடம் கவனம் தேவை

வாய்ப்புகள் அதிகம்: கல்வி, உத்தியோக முயற்சி வெற்றியடைய

மதிப்பெண்: 51%

மீனம்

அறிந்தும் அறியாததைப் போல் இருந்து எதையும் செய்து முடிப்பவர்களே! கடந்த விஜய வருடம் உங்களைப் பல வகையிலும் பந்தாடியது! ஜூன் 19 முதல் உங்கள் ராசிநாதன் குரு 5-ல் உச்சமாகி அமர்வதால் அதுமுதல் அடிப்படை வசதிகள் பெருகும். குடும்பத்தில் அமைதி திரும்பும். பிரிந்தவர்கள் ஒன்றுசேருவீர்கள். பிள்ளைகளிடமிருந்த கோபம் நீங்கும். கேட்ட இடத்தில் பணம் கிடைக்கும்.

வீட்டில் கூடுதலாக ஒரு தளம் அல்லது அறை அமைப்பீர்கள். திருமணம் தள்ளிப் போனவர்களுக்குக் கூடி வரும். மகளுக்கு நல்ல நிறுவனத்தில் வேலை அமையும். மகனின் பொறுப்பற்ற போக்கு மாறும். பூர்வீகச் சொத்தில் சேர வேண்டிய பங்கை கேட்டு வாங்குவீர்கள். உறவினர், நண்பர்கள் வீட்டு விசேஷங்களை முன்னின்று நடத்துவீர்கள். அரசால் அனுகூலம் உண்டு.

ஜூலை 12 முதல் கேது உங்கள் ராசிக்குள்ளேயும், ராகு உங்கள் ராசிக்கு 7-ம் வீட்டிலும் அமர்வதால் வாழ்க்கையே ஒரு பெரிய போராட்டமாக இருப்பதாக அவ்வப்போது அலுத்துக்கொள்வீர்கள். பழைய பிரச்சினைகள் போல வேறு ஏதேனும் இப்போது வந்துவிடுமோ என்று அஞ்சுவீர்கள். நவம்பர் 1-ம் தேதி வரை அஷ்டமத்துச் சனி நடைபெறுவதால் கடன் பிரச்சினையால் சேர்த்து வைத்த கௌரவத்திற்குக் கலங்கம் ஏற்படுமோ என்று கலங்குவீர்கள்.

நகை, பணம், முக்கிய சொத்து ஆவணங்களையெல்லாம் வங்கி லாக்கரில் பாதுகாப்பாக வைப்பது நல்லது. வீட்டில் களவு போக வாய்ப்பிருக்கிறது. நவம்பர் 2-ம் தேதி முதல் சனி உங்கள் ராசிக்கு 9-ம் வீட்டில் நுழைவதால் பிரச்சினைகள் வெகுவாகக் குறையும். குடும்பத்தில் இருந்த கூச்சல், குழப்பம் விலகும். வியாபாரத்தில் ஜூன் மத்தியப் பகுதியிலிருந்து லாபம் கணிசமாக உயரும். என்றாலும் நவம்பர் 1 வரை அஷ்டமத்துச் சனி தொடர்வதால் வேலையாட்கள், பங்குதாரர்களுடன் போராட வேண்டி வரும்.

ஜூன், ஜூலை, டிசம்பர், ஜனவரி மாதங்களில் லாபம் அதிகரிக்கும். கடையை மாற்றுவீர்கள். உத்யோகத்தில் இடமாற்றம், முகவரி இல்லாத குற்றச்சாட்டுச் கடிதங்களின் அடிப்படையில் சின்ன சின்ன விசாரணைகள் இருந்ததே! இனி ஓரங்கட்டி ஒதுக்கப்பட்டிருந்த உங்களுக்கு முக்கியத்துவம் கிடைக்கும். உங்களின் திறமைக்கு அங்கீகாரம் உண்டு. சம்பளம் உயரும்.

அதிர்ஷ்ட கிரகங்கள்: ஜூன் 19 முதல் குரு 97% செப்டம்பர் முதல் செவ்வாய் 85%

அதிர்ஷ்ட தெய்வம்: மீனாட்சியம்மன்

தவிர்க்க வேண்டியவை: அலட்சியம், எதிர்மறை எண்ணங்கள்

பெண்களுக்கு குழந்தை பாக்கியம், தங்க ஆபரணம் சேரும்

வாய்ப்புகள் அதிகம்: கடன் தீர, வேலை கிடைக்க.

மதிப்பெண்: அக்டோபர் வரை 55% நவம்பர் முதல் 85%