பெருந்தெருக்கள் அமைப்பில் 30 மில்லியன் டொலர்களை குறைக்க சீனா இணக்கம்!- அரசாங்கம்

கொழும்பில் அமைக்கப்படவுள்ள வெளிச்சுற்றுவட்ட பெருந்தெருக்களுக்கான நிர்மாணப் பெறுமதியில் 30 மில்லியன் டொலர்களை குறைத்துக் கொள்ள சீனா இணங்கியுள்ளது.

வாகன நெரிசலை குறைப்பதற்காக கொழும்பிலும் ஏனைய புறநகரங்களையும் இணைக்கும் வகையில் அமைக்கப்படவுள்ள இந்த பாதைகளின் தொகையிலேயே இந்தக் குறைப்பு அறிவிக்கப்பட்டுள்ளது.

அமைச்சர் ராஜத சேனாரத்ன, அமைச்சர் ரவி கருணாநாயக்க, விஜயதாஸ ராஜபக்ச மற்றும் ரவூப் ஹக்கீம் ஆகியோர் நேற்று நடத்திய செய்தியாளர் சந்திப்பின் போது இந்த விடயத்தை ராஜித தெரிவித்தார்.

ஏற்கனவே இந்த திட்டத்துக்காக ஒதுக்கப்பட்டிருந்த நிதி அதிகம் என்று சுட்டிக்காட்டப்பட்டிருந்தது.

முன்னைய அரசாங்கத்தின் முன்னணி அமைச்சர்களுக்கான தரகுகள் காரணமாக அந்த அதிக விலை நிர்ணயிக்கப்பட்டிருந்தது.

இதன்போது உண்மைப் பெறுமதியை காட்டிலும் ஏனைய பணம் சிலரின் சொந்த சட்டைப்பைகளுக்குள் சென்றன என்றும் அமைச்சர் குறிப்பிட்டார்.

இதேவேளை சீனா, இலங்கையில் மேற்கொள்ளவிருக்கின்ற பல அபிவிருத்தி திட்டங்கள் குறித்து இந்த செய்தியாளர் சந்திப்பின் போது அமைச்சர்கள் விளக்கினார்கள்.